يارب هبلي من لدنك المنطق الي فيه خير والكلمه اللي مايساورها لا ضعف ولا ردا
الشعر اخيره وابركه لا صار نابع من ضمير ماهوب شعر اللي يدور له عشا ولا غدا
وانا ليا منه طرالي راعي الاسم الكبير افز له واجر طاروقي واهيجن واحدا
اسمٍ ليا من راحت الدنيا عبوسٍ قمطرير ليا نطحنا به صعيبات المواقيف تهدا
نباه حتى الصم تسمع به ويبصره الضرير هذا اسمه لحاله يساويله مشايخ وعقدا
هذا رمضاني من سلايل زعب ممنة القصير من روس ربعي صلب جداني منزحة العدا
في جملة التاريخ ومن الحرف الاول للاخير حنا الخبر والفعل والفاعل وحنا المبتدا
وخواله اهل الطيب والميقاف والمجد الشهير خطلان الايدي مزبن الجاني بعيدين المدا
آلاد هشّال الدواسر سلة السيف الشطير أمان من جارت به الايام وازرى واحتدا
هذا سعد فهاد عون اللي زمانه مستدير على السعد ماعنده الا تم ماعنده بدا
يابو فهد عز الله انك غير وان يمناك غير تفرق عن العالم مثل فرق الضلال من الهدا
يا كم جلت كربه وعانت معسرٍ واغنت فقير ماكنك الا النور جلّاي الظلام ليا بدا
من كثر مافضلك وفضل يمينك الجزله كثير لو تمسح بيمناك راس مصخنٍ شره غدا
عبدالعزيز بن راشد بن دواس
