مجموعه قصائد مدح للشاعر ناصر متعب الحذيان
قصيدة في فهيد سلوم
من لااحتزم عاش بالدنيا وهو خايف
صكات الايام تسقينا مرارتها
والناس لوتقتنع من هرجة الزايف
تجيك ساعة وتكشفها ضرورتها
وفهيد بشته ذرا والكل له شايف
كم معضله قام ابونايف لصعبتها
جيناك بالعسر ياللي تعتلي النايف
ومديت كف ٍ تقدّم في مهمتها
اي والله انك على الموعد يابونايف
يانسل قوم ٍ تسر العين وقفتها
لازاد هم الرجال وحافها حايف
شرواك يبرك لها ويشيل حملتها
واللي بحاله عن جهود القسى رايف
الله يزوله من الدنيا ولذتها
والا انت لك دلة ٍ فنجالها كايف
بالعسر تقطع ضرم من كان ذاقتها
اسلم عدد من بصيفه زاور الطايف
واسلم عدد من بمكة تم حجتها
ياللي على حزة الموعد يابونايف
يانسل ربع تسر العين وقفتها
قصيدة في عبيد ناصر العيساوي
يالله ياللي تغيث القاع
من بعد مانسمع رعوده
يالله تقديني الاسناع
عن سكة ابليس وجنوده
من بعدها والرجال انواع
واهل المواجيب معدوده
وعبيد ناصر طويل ذراع
بالمرجله تقدح زنوده
وقف كما الصارم القطاع
من قو باسه ومجهوده
ماضاع من يزهمه ماضاع
يفعل وخلق الله شهوده
من يوم ضاقت وقف في ساع
يطاول الصعب ويروده
ياعبيد والقرم صيته شاع
ومثلك مزاياه محموده
ياعبيد والشعر لو ماطاع
يحرم كتابه ومنشوده
في مدحة ٍ توصل الاسماع
وفعل المناعير مشهوده
والطيب بين العرب ينذاع
يزين وقعه ومردوده
انت الكفو ياطويل ذراع
تمشي معا الطيب وتقوده
قصيدة في فيحان فهد البحيري
يابوفهد لك بالمهمات ميقاف
والرجل تظهر وقفته في صلفها
وانت الذي تشهر على راس مشراف
ماهمتك مهما تزايد كلفها
من حكمة اللي امره النون والكاف
اقدمت والمقصود يثمر خلفها
مع ابن عمك سقتها يم الاهداف
العفو والتسهيل غايه هدفها
فيحان يالعزوة وياذرب الاوصاف
مثلك هروج البهرجه ماجرفها
تبغاه من ربي ثوابك والانصاف
والا البشر وقفاتهم تكتشفها
وانت الذي تسرف على الفزعه اسراف
وتقول حب الذات جعله ذلفها
اللي لجا لك ماعلى مثله خلاف
تاطا شرور الكايده وتعسفها
عسى فهد في جنة الخلد ينشاف
فوقه ثمار ٍ يانعه يقتطفها
قصيدة في محمد سالم العويضه
لاقرقع الشعر داخل جوف الاعماقي
لابد يظهر ويعلن بالشعر ثوره
والقاف من داخل الاعماق ينساقي
واقلام شعري فكتب الشعر ماموره
لمحمد اللي بوقت اللازمة فاقي
حر ٍ تعلى وتسعد طلة حضوره
من يوم سمع الخبر في مرقده ضاقي
يحس حس ابن عم ويشعر شعوره
فز وعصب راسه الطيّب ومشتاقي
للوقفه اللي بوقت العسر مذكوره
العلم يبغى سواة البن الاحراقي
حتى يجي له طراه وتكفخ طيوره
وقت الرخا سهل والاحمال تنطاقي
لكن نهار القسى شرواك له دوره
بيني وبين المهاجع قطع وفراقي
لين انجلى الغيم والقمرا سطع نوره
يامحمد القرم ياللي دوم سباقي
للطيب لاهنت والوقفات مشكوره
رفعن الاقلام ثم جفن الاوراقي
وياجعل عينك من الاحزان ماجوره
قصيدة في هادي ناصر الحذيان
ابوناصر سلام وعز والدعوة على المكشوف
انا مااغط نور الناس والله فوقنا والي
اخو عمشا نقوله والنقط تنساب فوق حروف
هذا هادي وله رايه على راس الجبل عالي
فزع من دون منه والقلوب اللي غشاها خوف
تهنا بالسلام وهمها يرد الخلا الخالي
تعزوى وانتهض ثم قام للموقف بحدب سيوف
قطع شك الصعاب وقال كل الصعب ينزالي
بميقاف ٍ بها الرجال يبلش مايبل الجوف
قليل اللي تهقوى للثقيل وقال شيالي
يابن عمي لك البيضا على الفزعات والمعروف
ثواب ٍ من عزيزه الجاه يعرف وقت الاهوالي
الا ياكم نصيتك والحشا وسطه تلوف ظروف
وتضحك في حجاجك جاه وبفزعه وبريالي
على راسي معاريفك يابن عمي ومد كفوف
وليل ٍ كم سهرته والصباح ابطى وانا لحالي
والا مني تذكرتك طرت لي فزعة الملهوف
تذكرت العيون اللي سناها يشعل اشعالي
حمية خالصه لله وارددها على المكشوف
سواتك محزمي بالضيق من الاول وفي تالي
قصيدة في طامي راشد الفريح
ياسامع صوتي واذا كنت توحيه
خلك معي والمبتدى بالسلامي
من بعدها من دون مااحط تنبيه
طامي نعم طامي واباقول طامي
مليون مره عدتها من يمانيه
تجلى الهموم ويرتوي كل ظامي
لا احد ٍ يقول المدح يومي بناخيه
مير الصحيح يصب مثل الغمامي
يبل كبد الارض والميت يحييه
يامحيي الامال نعم الحزامي
فريحي ٍ براق عينه تراعيه
ويمناه غيث وضرب كفه حسامي
يقول للصاحب عوافي ولبيه
انا لكم نطاح كل الجهامي
ياما وياما يوم جينا حواليه
متضايقين وثار عج العسامي
من كلمة ٍ منه عسى اللاش يفديه
صارت بدال الضيق برد وسلامي
القاف شيب وانت ترقى مباديه
نور عن المحزون تجلى الظلامي
مثل البدايه قلتها في تواليه
طامي نعم طامي وبااقول طامي
قصيدة في سعيد هايف الحذيان
انا امدح المنعور من قاصي الناس
لاصار نافعني وقاضي لزومي
وشلون لو انه من عصابه الراس
بارقى بمدحه عاليات الرجومي
ياسعيد بن هايف على كل مقياس
من وين ماوجهت رمي السهومي
تصيبها ياطيب العرق والساس
ومن سطوتك تفرك عرام الخشومي
خليت هراج السعه وقت الاوناس
واقدمت مثل الحر من بعد حومي
ماتسهل الغبة على كل غطاس
ولاينضج الكيات غير القرومي
واليا غتنى الحطاب من ضربة الفاس
يغني هل الطاله نزوح الهمومي
عن كل من صابته بقعا بالاتعاس
دارت رحاها واردمن الغيومي
ياصلب جدي الف لاباس لاباس
مشعاب دنيانا على الراس يومي
يظهر لنا من معدنه مثل الالماس
وولد الهلامه في التقى مايقومي
والحمد لله ماوقعنا بالادناس
راياتنا بيضا بياض النجومي
ياجعل هايف يلبس السندس لباس
وشربه من الكوثر نعيم يدومي
يجنى حصاد الزرع من كان غراس
ومن عقبك يفخر بقرم ٍ عزومي
لمع الذهب ماينتقارن مع نحاس
اقولها واضرب عليها ختومي
ومن ضاق قله كان بالمدح منحاس
رح بلط البحر الحمر كل يومي
