من هجوس الشاعر ومنطق لسانه شاعرٍ يعجب قصيده جماهيره
جاكم اللي يعرف الشعر وأوزانه والقصيده من محطة تفاكيره
من ديار الخير عاني على شانه حفل راعي الطيب ملزوم توقيره
الكفو ماضيع أمجاد جدانه يازن علومه وفكره وتعبيره
مرحبا ترحيب بالطيب له خانه في حفل قرمٍ تقادح صعاطيره
مجلسه معمور والطيب عنوانه من سعى له شاف قدره وتقديره
عند مطر وعند ربعه وشيبانه والشحم والعود للي نصى الديره
مايقصر دون ماجوب ضيفانه وإن لفوا ربعه ماقدم معاذيره
صفحة التاريخ تكتب عن أخوانه سيرة ما بعدها في الزمن سيره
النشاما تروي كبود ظميانه كلما شان الزمان ومداويره
عزوة بالطيب والجود بطرانه آل صغير طيبهم شع تنويره
من هل الحيزا هل المجد وأركانه هم هل الوقفه هل العز والجيره
والختم من شاعرٍ يكسب رهانه والقصيد يزين حبكه وتصويره
خالد بن محمد الفريح
يابو مطر لا تتصل جعلك تدوم جيتك واجب مايجي عنه انحراف
لو كنت بالطايف تحت ذيك الغيوم اجيك وانظم من جديد الشعر قاف
عند الرفيق اقرب من زرار الهدوم فمزاين الذيدان او حفل الزفاف
من لا لبس من خامة الفزعة هدوم ماهوب منا جعل مثله للذلاف
لي لابتن بعزومها تصل النجوم تقدم على العسرة ولا ترجع خلاف
ابسط مفاخرها تنطح للسهوم يازابن ارقد واسترح تحت اللحاف
ماقلت كوم وحزة الماجوب كوم من مثلهم لا صار للجمع التفاف
واليوم حفلن تجتمع فيه القروم يامرحبا مليون في حفل الزفاف
يابو علي يالله عسى الفرحة تدوم في حفلة صغير بدعت اليوم قاف
ناصر بن متعب الحذيان
