تصميم / ناصر الزعبي  

موح القصيد اللي بلا سرج و عنان
أنا .. أعنّها ، وأسرج عليها .. و أصخّرها
•
من الفكر ، لي مهره تجهز لاصار رهاان
ومن عادتي ، فـ رهانها ما نخسرها
•
أبوها مردد ( ماهي بـ بس بنت حصان )
لها ساس ، فوق الزين .. يرفع مفاخرها
•
إلامن نويت أعرض بها ماني .. بـ بحلان
تصوّر .. ويااا سبحان ربٍ مصوّرها
•
ترزّ الشليل وتركز الراااس ،، بالميدان
ولا قدمها إلّا النود ،، تطرق مناخرها
•
( لبيب العقل لا شافها .. كن فيه جناان )
لها ضبح ( ويطير الشرر من حوافرها )
•
أمتّع بها اللي يحتري .. نادر القيفان
إلامن بغى يطرد عماااسه … يدورها
•
( ولاني سوات الشاعر ، البارد ، الكسلان )
بيوته هزال .. وكل يومٍ يكررها
•
ترى الشاعر اللي ماهو بـ يطرب الآذان
حرامٍ سماع أبياته إللي .. يجرجرها
•
تميّز بطرحك ،، وأرسم بريشة الفنان
تجنّب تكلف روحك ، الله ييّسرها
•
ثمين البيوت ،، تقال بالمجلس المليان
تحصّل مابين الجمع ،، منهو يقدرها
•
ولا يعرض الشاعر بيوته على الخبلان
ماتعرف معانيها ، ولاهي تفسرها
•
ترى الجزل ، مايكتب بيوته على ( الجدران )
( على جدار ! ) ماتلقى لها مَن يعبرها