تصميم - ناصر الزعبي  

يا مقرّ الزين وانواع الدلال ليه تحرمني نظر ذيك النّجل
ارفع رموشك على خدّك ظلال وانطق الكلمة وقاوم هالخجل
الاجابة عندك وعندي سؤال يا بعد عمري وروح اللي سأل
ياجمال الكون يا سرّ الجمال كيف هالرّقة تهدّ اقوى رجُل
والله اني ما استفيد من الجدال بس كانه معك يا زين الجدل
ولا تعجّل خل مشيك بالعدال لا بغيت تروح واجني بالعجل
كحّل الله عينك بدون اكتحال والله ما تحتاج تشري لك كحل
البدر يومين ويعوّد هلال وانت بدر التم دايم مكتمل
الغلا اللي لك بقلبي لا يزال ويمكن انه يزود يفداك الزلل
ودامك بعيني تراوا يا غزال لا تقول إكبر على شعر الغزل
تدري ان الشوق كثبان الرمال والجفا شمسه ومن يروي الرمل
في عيونك ظلم والخد احتلال وفي جبينك عز والبسمة عدل
وفي يدينك روح عشاق الجمال وفي لسانك عقدة اسحار العمل
طفّ لي صدري من ثلوج الشمال ودفّ صدرك من جنوبٍ مشتعل
من مشا في عتمة الوحشة ليال وش شعوره لا لمح نور الأمل

حمد بن نايف المدلاج الزعبي