رصيد المشاعر صار زيرو وبعت القشّ وظهر البعير اليا ثقل تقصمه قشّه
سملت وسملت من الاصاحيب من به غش خسرني وانا لوّ انّي آموت ما اغشّه
رفيت ورفيت اخطا الكثيرين رفْيَة عشّ وطير الندم لا صف ريشه جحد عشّه
وشدقي بفنجال العواقب خضر ما مشّ ولابي قشور اثمار صبري وابي المشّه
وليا طاب من عصبتك وجهٍ فوجهك بشّ جعلني فدا وجيهٍ عوايدهن البشّه
لهم في فوادي ودّ واضح مهو منخشّ وانا لي مودّه قلب ماهيب منخشّه
وليا هيب ميدان المواقف ولا احدٍ دش فحنّا على الميدان هذا لنا دشه
ومن قال فيهم كلمة لسان حشّه حشّ ولا هيب عادة بألسنتهم تجي حشّه
ردي رديه اللي بين الآذان شغله وشّ ولا اردى منه غير الذي صدّق الوشّه
ومن يمدحك ويسب ابن عمّ قلّه أشّ ولا هوب قايل غيرها لك عقب لأشّه
ترا الضرب متسلّط على كل راسٍ هشّ وسلّط على رقابٍ تجي روسها هشّه
وليا جات في راسك من اقراب ِ مشّ ومَشّ وليا جاك من يطلب عطه حقّه ومشّه
وهبوبٍ ليا ثرت اول اليوم تالي عشّ ولا تستثير الجايع وغدّه وعشّه
ولو كان للسمعة صيانة قطع و ورشّ شرا كل خايب ما نقص منه في وورشّه
ضعاف النفوس تعود كنها ذباب الكشّ يعوّد بلا عزّة ولا تطرده كشّه
واذا البير صافي ماه يشرب ولا ينطشّ واذا ما بقا الا دلو واحد كدِر طشّه
ولا تعطي الهذّار سرّك تبيه ايخشّ إذا ما قدرت تخشّه اشلون بيخشّه
واذا جيت لك مجلس وجا فيه زوم اخششّ فخلّك الأشم الاريحي تلطم اخششّه
وموترك لا دش الحَوَرني قبل مايدشّ يبي نمرةٍ ما هيب نمرته في الدشّه
ومن رزّ نفسه للبنادق تنشّه نشّ ومن حط نفسه سالفة الألسن اتنشّه
حمد بن نايف المدلاج الزعبي
