قصيدة من الشاعر محمد بن فهد بن سلامة الرمضان
مجاراة للشاعر فهد بن عبدالله الرمضان في مدح
منديل بن محمد بن عجران السحوب
البارحه والنوم ماني بويّاه وإليا نشدوني ما لقيت الأجابه
كنّي مشتّت بال همّه تولّاه ما يلتفت للزّاد ولّا شرابه
ماهو مثل هَم الملوّح وليلاه ولا همّني عشق البِني والصّبابه
همٍّ شغل بالي وفرّه وعنّاه من هاجسٍ دندن وفكري غدابه
واللّي نِدَه فكري وحدّه وخلّاه متيَقّضٍ مابين ضيق ورحابه
قافٍ عجيب وشدّني للمجاراه مع حبكة الأفكار فَن الخِطابه
مجوّده منهو درَس عِلْم جدواه ما شفت به غلطه ولا عيب شابه
خذيتلي ساعه وأنا أعيد وأقراه إبداع من شاعر ولا به غرابه
شاعر ولد شاعر بيوته منقّاه ماهو مثل منهو خذاها نهابه
يتعب على أبياته وياصل لمعناه ويصبّها صب الذهب بالكتابه
واللي رفع قافه وزاده وعلّاه وخلّاه يسبح بين غيم وسحابه
مدحه لأبن عجران شوق الخَوَنداه عوق الخصيم اللي عطيبٍ صوابه
إمنومسٍ ربعه مع الناس طِرياه لا حَل طاريّه لقا مرحبا ابه
عطاه ربي إمْنَ المراجل لين أغناه ولا عِدّو أهل الجود يحسب حسابه
كريم جاه وكل ربعه تنصّاه إمجمّل المنطوق شيخ الذرابه
ماهو مثل من يعطي الضيف علباه ويسكّر اللمبات ويصك بابه
لا والله ألّا عكس ذلك وشفناه مع كثرَة الترحيب لين وحبابه
ذرب اليمين اللي جزالٍ عطاياه إمطوّع الصعبات ذيب الذيابه
اللي عليه البشت لايق ويزهاه فعله فَرَق يوم الأسامي تشابه
ما أذم أنا غيره وأنا أستغفر الله لكّن أبوفيصل نِدَر من شبابه
مرحوم يا عودٍ على الزّين ربّاه ولا تحوشك نار يا بَطِن جابه
وإخوان وضحا هُم هَل العز والجاه كل السحوب شيوخ ربْع وقَرابه
وحنّا عيال العود والكِبر لله أهل الفخَر والطيب وأهل المهابه
اللي صفا معنا على الدّين ويّاه نمشي معه درب الخطر ما نهابه
واللي رفع خشمه نجي ونتوطّاه ويشوف ما يكره نهار الحرابه
وكل الزعوب ونعم والقول ختماه يا لابةٍ والله على العز لابه
هذا وصلّا الله عدد تايبٍ جاه على الحبيب المصطفى والصحابه