مالت موازين الهقاوي وأبتدى وقت العذاب لين أرجحت ميزانها ولا لقت قلبٍ يتوب
أحس بحساس البشر وانزف حبر وانا مُصاب ولا قدرت اترجم اللي في وسط قلبي يجوب
هنا بدايه للرحيل اللي جرح عين الصواب ولاّ بدايه للألم ولاّ عن الواقع هروب
هذا السؤال اللي تمنيت إني ألقاله جواب وغيره 300 سؤال تزود لا هب الهبوب
عاتبت بأنواع الأساليب ولقيت إن العتاب مثل الصدوق اللي تمنى الصدق من شخصٍ كذوب
وأسرفت بحسان النوايا وأكتشفت إن النصاب مهما تشوف إنّه نجاح بداخلك يبقى رسوب
لو السما تمطر صبر ما كان بيشح السحاب لو ان قطرات المطر فالصيف ما توصل تذوب
والفقد موحش والمسى داكن مثل ريش الغراب وبدر الدجى لا غاب تغني لمعة سهيل الجنوب
إلى هنا وأستسمحك بقفل سجلات الكتاب تعبت أكون لك شروق ولا تكون الاّ غروب
انا تعبت من الضياع اللي لقيته فالغياب وأشد أنواع الألم طيحة مقدّر ومحسوب
عبدالله بن شنار