تعال ياللي رحت وعلومك علوم بالله مالين غيابك خفوقك
ماكن لك خلٍ من البعد مظلوم وانته خشير البعد نفسك تسوقك
يبقى عميل الحب مجفي ومحروم وانا العميل اللي خسر وسط سوقك
جيت استغيث الوصل واطيح وآقوم ما هل وبلك يوم لاحت بروقك
كنتي سواة العفو بعيون محكوم واليوم عن وصلي تبين عقوقك
رحتي تبيعين المحبة بلا سوم ماهو كذا طبعك ولا الذوق ذوقك
اظلم غرامي والسما مابه نجوم ياشمس عن عيني تباطا شروقك
عن ذنبه الانسان ماهوب معصوم وعن رجعتك مافيه شين يعوقك
ارفي شقوق الحب وابدي من اليوم والا الوداع ولا انتقص من حقوقك
مني وعد ما القاك لو كان بحلوم وان جيت شحي لو بنظرات موقك
قلبك له القسوة وقلبي انا يشوم ياقلب بالشيمة تخيّط فتوقك
ناصر بن متعب الحذيان