ياساعيٍ للخير ممشاك في نور والنور من ساسك عظيم ومديدي
من يبذل المعروف بالخير مذكور يكسب له الحَسْنَاتْ ويَعْلا الرصيدي
ومن يبني الأفراح في قلبه اقصور يبقى على طول المواقف سعيدي
ومن ياخذ الحكمه على نهج معمور يبشر بعزٍ مايشوفه عنيدي
ياصاحبي مشكور مشكور مشكور سَعْيَك إلى العليا ثمين وتليدي
لاتجرح اشعور الأوادم ولا تبور خلك رحيم وفي حديثك رشيدي
العود لا من فاح بالمجلس ايدور ماضرّته مَسْكَتْ يدين البليدي
ترى الستر لاهل الردا شي محذور واهل الكرامه في سترهم تجيدي
بعض البشر لامن هرج حطّم اشعور يمشي على الزله ولا هو يحيدي
وبعض الاوادم لا حكى جبّر اكسور شامخ ويبقى في علوّه فريدي
من يدفعك بالطيب وياخذك بالشور جوّد على يمناه نعم العضيدي
واللي على قربه يجي هم واشرور بينك وبينه حط حاجز حديدي
لا تتبع المقفي ولا انته بمجبور من هو يبيك انصاه لو هو بعيدي
للعُرْبْ سلم وللأجاويد دستور ون ماحصلْ طيّب تفرّد وحيدي
الشمس لا من أشرقت شعشع النور واليا اغربت ماكل نجمٍ يفيدي
محمد بن ابراهيم الحميان