يمر العمر والانسان في دنيا العنا ملهوف يبي وقته رغد والحظ ورد ٍ عطره يكنه
يبي حزنه سراب ولو صدق يشبه بروق صيوف يبي حلو الاماني تنحره طوع ٍ بلا منه
وانا حلمي مثل غيري مقره ثابت ٍ بالجوف عشقته عشق راعي بن يضرم دايم لبنه
حضنته واحتميته من غلاته لا يجيه الحوف له اصبحت الدفا بالشبط والذعذاع بالكنه
هقيته بالسعد مقبل ولا عقب القبال نكوف تخيلته ثغر ورع ٍ بعيده ضاحك ٍ سنه
واثر حلمي زهد مده ولا جا للتعب مخلوف لطمني واوثق قيادي بعد جا للوغى شنه
علاماته حزون ٍ للملا تظهر على المكشوف وقلب ٍ ذكرياته كل مامرن توطنه
محاصيله شراع ٍ كل ما ابحر رده العاصوف ومخاسيره سنين ٍ بالحسايف تقرع الشنه
حزوني صارت مقيمه ولا مرت مرور ضيوف وحلمي غادر من الجوف لا مني ولا منه
تعبت وقلت ياحلمي حقيقة تنكتب بحروف اثرك اصبحت عندي مثل حلم ابليس بالجنه
ناصر بن متعب الحذيان