ماهي تضيق إلا على عيال الرخوم ولّا على عيال النشاما ما تضيق
جعل الردي لا طاح حظه ما يقوم اللي طبوعه كل يوم ٍ له رفيق
ترى عيال البوم تبقى عيال بوم لاهي تصيد ولا تعرف الا النعيق
مواقف الاجواد تحكمها السلوم لو كان حدتهم على جرف ومضيق
ما يعتلي إلا قويين العزوم وما ينزل إلا نايم ٍ عيّا يفيق
العز يرقا بك سما بين النجوم والذل يهوي بك تحت وسط الحريق
والطيب سلعه غاليه عند القروم ولّا الردا بضاعة ٍ لأسهل طريق
الطيّب إن جيته ولك حاجه يقوم ولّا الردي بتروح منه مستضيق
مايصنع الاسما سوى رجل ٍ عزوم مهما يهب الريح ثابت يا طويق
ولا يحرق كروت الرجال إلا العلوم اللي تسود وجه وتشتت فريق
والعمر يفنى والخلايق ماتدوم والذكر يبقى ياهل المجد العتيق
أما تفاخر بك ربع وتعز قوم ولّا ترى مالك زفير ولا شهيق
لاهبت من الامواج ما تقدر تعوم تموت موتت ذل أو موتت غريق
لا تنكسر وتعيش دنياك مهزوم القلب قاسي لا تقول انه رقيق
راس ٍ يهوم وراس مايقدر يهوم وان نشف ريق يجيك يوم يبل ريق
مافيه احد فالناس ماعنده هموم والحزن خلا عيوننا فيها بريق
خضنا مع الدنيا دفاعات وهجوم وان وقفت في وجيهنا ما نستضيق
حنا نعرف الناس ونعرف الوسوم ونميز الوجه العبوس من الطليق
وان صدت وجيه المصالح فاللزوم ما صدت وجيه الأشقا للشقيق
مبارك بن فالح الوشمي