وشفيك ياقلبن عوى عوية الذيب روس الرماح العلط كنها تخجه
راحت مجاهيم الشعر كلها شيب مطاف من عمري على العز وجه
وقار طلع الشيب ماهو عذاريب العيب في اللي الواجبه ماتوجه
شرف على روس الجبال المراقيب اهل الصخى معهم على الفعل حجه
العرف مايجهل حصان الاطاليب اللي عن الماجوب مافيه سجه
في مزارق سلوم العرب والمواجيب ورجله على المرقاب لازم تسجه
طلق الحجاج اللي كثير التراحيب محزم ظفر بالخوف قطاع فرجه
اعرف خوي الجنب بين الاصاحيب اللي عروق اهل المكارم تزجه
سلايل الندر عريب المجاذيب اصمك صواديف القدر ماترجه
ولا ضعيف الرابعه والمحاضيب بوسط البحر والموج لا عام زجه
بعد النظر غاية زحول الاشانيب وقصر النظر تضيع بطراف عجه
من لاشرب بالكف عذب المشاريب اللي قراحه صافي النبع مجه
ماله مثل طلع النداوي مكاسيب تنزل سهومه مارتفع فوق برجه
الحلم يجنب صاحبه منزل الريب وبعض البشر من غير عقله يوجه
ياطيب منهو لا رحل عقب الطيب بممشاه وفعوله وطيبه وهرجه
طاريه يسمعبه بعيد المناديب ومنهو شهر يالله من الضنك نجه
مجالسن لا جيت تلقى المعازيب فنجال والكنبود ريحه يعجه
مع فوح كيف البن لايمكن يغيب وسوالفن ذربه ولا هيب ضجه
ومجالسن للقيل والقال والعيب في عقولهم على المقفين رجه
سبح بذكر المعتلي عالم الغيب صل الفرايض وخذ عمره وحجه
لاهيض مشاعرنا هبوب الدواليب دونت طاروقن على البال نسجه
يختار جزله من مضاله تجاريب ولا شد سرج الخيل ما مال سرجه
الصقر لولا ساطيات المخاليب ما كان شفت الخرب ضيع مهجه
لاحام فوق الجول عطب المضاريب حول بها وصدر ابرق الريش فجه
سعد بن تركي السحوب