انا لها العندليب وفنّها الراقي وهي لي الأغنية واللحن واحساسه
وهي لي السعد والراحات للشاقي وانا لها العقد واحلا منه لبّاسه
وهي لي الماي وهي الكاس والساقي وانا لها الهالك اللي يلفظ انفاسه
وانا لها الروض وهي النوض بآفاقي نوضٍ يبشّر بوجه الروض عسّاسه
وانا لها الكحل في خدرات الاحداقي وهي لي الهم هوجاسه ووسواسه
وانا لها نصف قلب وهي لي الباقي وهي لي الروح في جسمي ونبراسه
وانا لها البحر والمكنون باعماقي وهي لي النور في بلورة ألماسه
وانا لها الشعر وهي الحبر واوراقي وهي لي آمال شخصٍ ذابحه ياسه
وهي لي الفجر لو يبطي بالاشراقي وانا لها بلاد عزّ و عزّه بناسه
واكابد هموم صدري كلما ضاقي وأنا الذي عاش وِحدة بين جلّاسه
ما نيب الاوّل ولا باخلاقي اخلاقي ياحلمي اللي طرد عن جفني انعاسه
بيّن من الموت لمعه تحت الاعناقي اربع وعشرين مافي سبكه انحاسه
ونقشٍ على مثل عرجونٍ على ساقي يردع من الليل خدٍ كنه قرطاسه
لولس على شبر ينطح شبر متلاقي وحدّر على اللي يفكّه من تلولاسه
والخاتم اللي على صفّ البرد حاقي من دونه الباب مقفولٍ بترباسه
كان الغرور يعقد لك نية افراقي حقدي على ذالغرور اتدندن اجراسه
نسايم الوجد جت من نجد لعراقي اتحرّك الغصن من راسه لكرياسه
سياسة الحبّ هي هي رغم الاعراقي يامدمرة كلّ عُرفٍ فيه بسياسه
يابرد بردك ويا عجلك على احراقي قالت عسا الله يضعف من قوا باسه
قلت إنّي آسوس خيلٍ قُبّ واعتاقي قالت وانا المهرة اللي تتعب السّاسه
قلت انتي السمّ قالت ضاع ترياقي قلت انتي السرّ قالت مات بلّاسه
قلت انتي الجود قالت ما به انفاقي قلت انتي الكنز قالت عند حرّاسه
بتبوقني ؟ قلت لا مانيب بوّاقي لكن طبوعي مع الرغبات محتاسه
قلت انتي الكذب قالت وين الاصداقي بيعت مع الصادقين بسوق نخّاسة
قلت انتي الفتنة اللي جفنها فاقي قالت وشيطانها انت بعينه وراسه
قلت انتي المسّ مسٍّ ما يبي راقي لبّيه يالمسّ ما احلاه وتلبّاسه
حمد بن نايف المدلاج
