صحيفة الفرسان ـ تصميم / ناصر بن شمروخ
.
هواك مع دمّي جرى متسلّل وكبّر خفوقي له وقام وهلّل
ياما انتظرتك ما التفتّ بنظرة ياخي كراسي الانتظار اتملّل
الشمس من بين السحاب تبيّن لابد يوصل نورها متخلّل
لو تذبحك علّة نهاية قصّة الله ولا عمرٍ تعيش امعلّل
صرت اقتنع بان النهاية غاية ياللي تعيش بدايتك متدلّل
عندي كلام وأسئلة تذبحني إملأ فراغات الفضول وعلّل
وشلون قلبي تغرقه في حبك وتقول لا تطلع عليّ متبلّل
وشلون تسجن جزء مني عندك وتطلب من الباقي يجي متهلّل
وشلون تسكنّي وتحرق دارك وشلون تلقا للذنوب امحلّل
وشلون خدّك بالضيا متنوّر وفي الوقت نفسه بالهدب متظلّل
وشلون عينك بالسحر مسودّة وحجاجها من فوقها متكلّل
ارجوك زدني من سهام عيونك وان شفتني بآموت منها قلّل
ثم هات أُكسير الحياة ببسمة مسك الختام وموتة المتذلّل
حمد بن نايف آل مدلاج
