تصميم / ناصر الزعبي
القصايد جزت منها ماعاد اشري وابيع عقب ماعاثوبها العالم المتسوله
غير لا من حل طاريك يالسد المنيع جبتها نسخه جديده ماهي بمقوّله
في نباك يشوش راسي يابوراسٍ شجيع واتنقى خيرة الشعر واجيب اجزله
مرحبا في حفل خالي راع الاسم الرفيع عند عبدالله بن سعيد تاج المرجله
انت ابو فعلٍ مسما وابو صدرٍ وسيع وانت في كل المواقيف راع الاوله
اتباها فيك واذب باسمك كل ريع وارتفع بين النشاما مقام ومنزله
رمضانيٍ على طاري الفزعه سريع فيه لكبار المهمات طنخه وعجله
فزعةٍ ماهي بتنصاك تاليها تضيع كنّها فرضٍ يصلّى بليا بسمله
باسمك نداحم الاكابر ونعصي مانطيع ان بغينا ننقض الحبل ولا نفتله
يالحليم اللي ليا كبرت القاله صديع كل عوجه يابو فواز معك معدله
عشت يالكف الرهاوي ويا السيف البتيع يا حزام ٍ كل صعبه معاك مسهله
عبدالعزيز راشد عيد بن دواس الزعبي
