تصميم / ناصر الزعبي  

وجه الشبه بيني وبينك ياسراج انك صديقٍ لي ويا نعم الصديق
لك حزّة يفهم بها وش الاحتياج انت الرفيق بوقت ما يلقا رفيق
اهم شي تحط في الوجه ابتهاج وتصبر على الخوّة بعتمات الطريق
فينا شبه وصدورنا هاذي زُجاج وقلوبنا دايم بداخلها حريق
لكن اذا جانا الهوا صلف وعجاج نطفي ومن حَرقة جديدة نستفيق
واللي يشاف من الفتيلة الالتعاج ربع وثلاث ارباع في الغبّة غريق
الداء عيّ ولا لقينا له علاج حتى المكان يضيق لو ما فيه ضيق
وسفنٍ يروج بها الهوا من حيث راج وقاع البحر من تحت باطنها عميق
والبحث عن سبّة يسبب الانزعاج وشيٍّ يليق وشيٍ يمكن مايليق
يمكن تحفر البير يطلع لك هماج ويمكن تدوّر جير تلقا لك عقيق
والوقت لوه ايطيع سويت احتجاج لكنه يجبرني على ما لا أطيق
كنّه يحاصرني من ضروفي سياج وصارت تفاجئني رُماة المنجنيق
عيّت تجي دنياي لي حسب المزاج وعيّا يجي في العين للدرهم بريق
لكن ترا الحكمة على أيّة راس تاج خذها ولو جاتك من الدهر السحيق
لو جاك من بلدان هالدنيا خراج فيها بلل ريق وبها نشفات ريق
وقد قالوا ان الرزق باطراف العجاج واحذر مع العجّة يجي تحتك زريق

حمد بن نايف المدلاج الزعبي