يدور الفلك والناس تجسر على التغيير وذي سنة الله مابه احد يبدلها
لحق بعض خلق الله بعد ماغتنى تاثير وزهد فـ السلوم اللي منوّل يبجلها
مع الناس مبدا الطيب ما يقبل التخيير ومثل ما تحب انها تعاملْك عاملها
وانا العام حثيت الركايب وجيت عمير وهو عزبته في ديرة مطير منزلها
ويستاهل العنوة ويستاهل التقدير حفظ سلم جده والمواجيب كملها
ابن عم وسنافي ولا يلحقه تقصير عموماً ترا ال فريح تعرف فعايلها
ركن زعب عاد الناس هلكا و لامن خير ياكم سربةٍ و زبيعر العود بأولها
وراع البويضا مزبن الشيخ يوم نقير لفى بالبنادق عند ربعه وجملها
وانا جيت مالي فيه حاجة ولابه غير محبة من الاعماق لعمير شايلها
لفيته وكرمني وشفت الحلال عصير بكارٍ ما ينسى زينها من يخايلها
ليامن نشدت وقلت هذي على اي بعير يزعزع له اسمٍ تنتمي له سلايلها
كحيلان غاية من بغى لبله التطوير واهله الكبار اللي كبارٍ جمايلها
الغصين لا والله ذولا جبال النير اهل وقفةٍ مافيه رجال يجهلها
ياكم بدويٍ يطلب الله بالتيسير يبي من ورا كحيلان ذوده يعدلها
ليا من وصلهم عيّن الطيب والتوقير وبعارين عودٍ للبداوين سبلها
وعبدالمجيد لـ موقف الطيب حث السير ومواقفْه عند عمير واجد ويفعلها
ولا ساق معروفه براعي البويضا عمير ترا كن معروفه على زعب بأكملها
علي بن محمد البراطمي