لا ضاقت الارض وأصحاب المقام الرفيع قامت عن الطيبين تصدد خشومها
يالله عليك المخارج يالعليم السميع الناس لولا الأمل بِك تفْتر عزومها
الوقت قاسي وطوّع واحدٍ يطيع أهل الحلوم الكبيره طيّر حلومها
اللي معه عزم ياصل غايته ما يظيع يسري الليالي ولو مابانت نجومها
مَنْ كان بالله متوكّل وراسه شجيع يمكن يدكّ الجبال ويمسح رسومها
وقومٍ بليا عزايم ماهي بـ تستطيع لو تنفخ صدورها وتكفّس كمومها
ولا كل ليله على الإنسان خير وربيع لابد من ليلٍ يا كثر محرومها
ولا يحد الرجل يشكي ويتبع وضيع إلا ليالٍ توالت ترسل سهومها
تكسر عصى الرَجل من حاجه وعلمٍ فضيع وتبرّكه ليلةٍ ما يقدر يقومها
الله ولا حاجةٍ عند الرديّ اللكيع السالفه من طرفْه يكثّر هدومها
وإليا نفع يحسبنّه شالحٍ والفديع من فرحته ليلته مايهتني نومها
وإليا أنكسرنا من الحاجه ماحنا قطيع ذيابةٍ فـ إنكسارتها عشى يومها
نحتاج وإذا بغو منّا فـ سدٍ منيع لـ الطيبه نحتسي والجزله نرومها
بسلوم أهلنا نسير وفضل ربي وسيع ولو تكثر الناس ماهي ترخص سلومها
علي بن غنيم المديبغ