.
البخل دربه شين ماياتي بخير يلبسك من عقب البياض السوادي
لوّك تصيقر فـ الرجال الصقاير تميّز الطيب نهار الهدادي
ماكل طير يصيد لو إنّه يطير إلا الأصيل إن كان هدوه صادي
مرافق الطيب يزيدك بـ توقير لوكان دربه عسر هذا مرادي
نمشي مع اهل الطيب واللي نفخ كير ينفخ جعل نفخه يزيده سوادي
الوقت لو ينذر على الناس ويغير ماهو بـ ماخذ غير ما الله رادي
سنّد ليا شفت الليالي محادير ومن جود ربي طيب الراس جادي
يقولها اللي ما يحسب المشاوير غمرٍ جعل زهرة حياته جهادي
لا حسبو للمال ورد ومصادير من دون وجهي يا عساه النفادي
الحمد لله ما جدودي معاثير يِـعنى لنا في يوم ماهوب عادي
نمشي بسكتهم ولا نخلف السير ما نزهد بـ عاداتنا والمبادي
وإذا كسرنا الوقت لاضير لاضير بكره نجيه بـ همةٍ وإجتهادي
علي بن غنيم المديبغ